Forum - www.szalency.de

Ojgyn z Pnioków

Ja, jo miarkuja, co sam już ta możno gyszichta fónguje ale jo jóm kca łopedzieć inakszij:

Tak jakiesik ze trzi-śtyry tydnie nazôd uwidzôłech jak downiyjszy poseł Hajna Kroll groł za hampelmana, za kaspra Ololo, kiej rzóndziół we telewizyji, co te wszyjskie, ftóre pitli do Rajchu tak jakosik we tych latach siedymdziesióntych i łoziymdziesióntych, muszóm terôzki łod nôs Polôków erbnóńć ku wrotóm to wszyjsko, co sam łostawiyli kiej śmiatali choby jich morzisko chyciyło. A jô sie pytóm, fto jim kôzôł wtynczôs śmiatać do tego jejich farbistego faterlandu, fto jich wyciepowôł ? Samie śmiatali, bo na isto medikowali, co we Miymcach ta Pónbóczkowo sznita chleba jes ze dwiuch zajtów poszmarowano szpyrkóm. Nó, tóż wszyskie – tak sie terôzki medikuja – boczycie jesce gynał jak to te ludzie, kiere nôjprzodzij markiyrowali srogich Polôków podwiyl bakali we werku abo na grubie, kiej ino uwidzieli ździebko łozewrzite dźwiyrka na szweli, na granicy we tych latach siedymdziesióntych śmiatali do EF-u łod tyj dioseckij „kómóny”, kiero tak by tak już bóła łobalóno i skuli tego musieli jak nôjgibcij szibnóńć, skalić wszyjsko, co do siela mieli we pomiyszkaniu. Naszołech tyż kiejsik i tako anónza we cajtóngu:
„Skuli wartkigo wykludzyniô sie do Rajchu skala drabko:
Wertiko na hółch-glanc, szrank ze trzidźwiyrzaty i jedna almaryjo, szeslóng łodwanckowany, dwa ligynsztule łod mojigo Hajny, dwa krisztalowe krónlojchtry, dwa nachtiszle, wysnożóny tepich i śtyry gardinsztangi, śtyry zesle, waserbanka, starzikowy drajfus, ryczka, góminianny trit i sztrółdekel .
Króm tego jesce na gwołt kca skalić:
Szykowny platynszpiler na kurbla, jedyn ałslynderski landszaft, blumsztynder ze mertami i szczyrbokiym, skutela ze sznitlochym, ku tymu bifyj i szybónek a driny flajszmaszina do gychaktys, trzi biksy po magiwyrflach, topfkracer, flaszynpucer, norychta do chytaniô lałfek, szpangi i cwingry do wosów, dwa kwyrloki, trzi rogolki, ausgus po starce, dwie drzewnianne dziyżki, nachtop z handgrifami, jedyn srogi zalyjtowany kibel, drótowany bónclok, trzi mesingowe kokotki, badywanna, szisel i makutra, kółlkastla zrychtowano we werku bez Hajnela, dwa sztrółzaki nafolowane grochowinóm, prykol ze mesingowymi gylyndrami, klejdersztynder ze poróma biglami i pelcmantlym we miechu ze kugelkóma na moty, pelcowo mufka, dynciok, dwa pliszhuty, dwa kłobuki, jedyn sztajfhut ze szyrokóm krympóm.
Kómoda na prodło a driny: śtyry hymdy ze ibricznymi kraglami i sztulpami, dwie formetle, trzi poflikowane óberhymdy, hółzyntryjgry, spodnioki chnet blank bez rostfleków, ibercyjer, modry kapudrok i olimantel, jedyn brónotny i jedyn corny ancug, trzi pôry sklabustrowanych batkow, jedyn pulówer i dwie sztrikjaki ze sztopowanymi elbółgami, śtyry pôry posztopowanych fuzekli, cwiter ze rolkraglym, galoty (hajdawer, pómpki i jedne sztrajfki), ducynt jesce niy posmarkanych sznuptychli, trzi poszkróbióne płachty i cołkie łobleczyni na prykole.
Ku tymu wszyjskimu na łostatek jesce: szrancek na szczewiki, szułancijer, sebuwacz, szpaner do szczewików, kozidło, kryka po starziku, połómany paryzol, starzikowy gybis, bigelbret, kloper, drzewnianno brółtbiksa, pora holyndrów i szlyndzuchy na kurbla, nyjkastla i szuflôdka na cwist i knefle, łobheklowane bigle, śtyrnoście krałzów po uherkach i apfelmusie, jedna kanka na mlyko, blachówka, zbónek do malckawy śtyry becherki, dwie szczyrbate szolki, śtyry glaski, achtliki, sztamperliki, jedyn pokal i kulawka, dwie flaszki brynolu, biksa cinkwajsu, piksla fyrnajsu,
Jesce sóm tyż i babskie szczewiki ze wysokimi krómflekami, bacioki, lakszuły i pora starzikowych charbołów, pora laci i roztrajtane klómpy, wyglancowane sztible po staroszku rajterze, holcoki, dwa sklabustrowane i potrajtane tepichy przismycóne łod ruskich, dwie gardiny i śtyry zazdroski, dwie drzewnianne gardinsztangi i jedyn gysztel do szpanowaniô gardinów, faska po kapuście, śtyry kible, bez zezuli kukuksur, hakynbret, krzipki, cija i mónhamónika,
kilkszrank „Минск-10” , brónotne kachle ze łozebranych kachloków, jedyn koksiok, jedyn trociniok i kanónek (żeleźniok) bez wirchnij platy.
Nó i blank na łostatek jesce: drzewnianno kara, króliczok, klotka ze basztardym, karbidówka, dwie taszlampy i maśnica.
Wszyjsko to mogecie sie łobejzdrzić we naszym familoku pod adresóm (tu już niy byda gynał tuplikowoł kaj) ale musicie sie festelnie uwijać, bo za tydziyń mómy abflug fligrym ze Pyrzowic direkt do München.”